بقيت نيله

كل حاجه حوالين الواحد بتدفعه للقرف و الهروب اللا متناهى
طيب نعمل ايه
نهرب لغايه فين
انا من ساعة ما وعيت على وش الدنيا و كل اللى حواليه من سىء لأسوء
مش انا بس
كل الناس
انا متولدتش فى الشارع
بس متولدتش فى بقى معلقه دهب
عادى يعنى
كل حاجه قرف
الكليه
الناس
البلد
الحكومه
رجال الدين
انا
كل حاجه
من زمان هربت من الواقع لجهازى
اتنيلت اكتر
بقيت مدمن نيله كمبيوتر ونت
و حياتى الاجتماعيه باظت اكتر ما هى بايظه
انا مش منطوى
انا عادى
زياده عن اللزوم
مش ممل و تقيل
بس دمى مش خفيف و مسخره
انا عادى
انا زى ما انا
و بنعزل عن الدنيا حبه بحبه
بكلم نفسى فى الشارع
اه و الله بكلم نفسى
مش جنون
بس مجرد تسليه للنفس
حكلم مين
انا وحيد
مش عايش لوحدى و ماليش اصحاب
بس مجرد ما بسيب الناس ببقى وحيد
وحده قاتله
انا مش متدين
بس بحاول معملش حاجه غلط
مش فخور بنفسى
بس مش ناقم عليها
انا حاله خاصة فى نفسى
بس فى كتير زيى
حاله خاصة فى نفسهم
و الناس تستعجب من الانفجار
طيب اعمل ايه
ما هو يا توفروا لهم الكله
يا تجيبو لهم بيوت
 اختار ايه
الكله ولا البيت
مش عارف
الحياة بقيت نيله
كل حاجه
المخروب اللى انا قاعد قدامه ده سرق حياتى
و مش قادر اسيبه
المخروب ده لجأتله كوسيله للهروب
من واقع نيله
انا نيله
انا زهقت
انا تعبت خلاص
لو فهمتوا حاجه من اللى فوق
ابقوا فهمونى
عشان لو فهمت يمكن استريح