مع يوم ليلى الثالث فى سؤالين مش لاقيلهم إجابة لغاية دلوقتى .
الأول … هى ستات البلد دى عايزه اسه بالظبط ؟
بس بعد ما سألت الؤوال ده لنفسى لقيته مش منطقى .
مين قال إن ستات البلد كلها إشتكت ؟
و مين قال إن اللى بيشتكوا بيشتكوا من نفس الحاجة ؟
و مين قال أصلاً إن كلهن ليلى ؟؟؟
و كلهن مظلومات ؟
و الراجل الكخة هو اللى مبهدل الدنيا ؟
اه فى ستات مظلومه كتير … و أكتر من الرجاله المظلومين 100 مره
بس هل ده معناه إن الستات كلها حقها مهضوم و متبهدله ؟؟
بغض النظر
لو فرضنا إن ده فعلاً الحال .
أنا عايز أعرف بقى انتوا عايزين ايه ؟
مساواه كامله بالرجل ؟؟
عارفين لو الموضوع ده إتطرح للتصويت للنساء فقط .. أراهن على كل ما أملك من حطام الدنيا (55 جنيه ) إن أكتر من 65% من الستات حترفض إن مكنتش النسبه أكتر .
لأن زى ما الستات مظلومه فى حاجت كتير فى البلد دى ؛ ليها برضوا إمتيازات خدتها بوضعها كأمرأه .
اللى مببتدبهدلش فعلاً و تشوف الذل مع الناس إلا لما لا قدر الله أبو العيال يموت أو تطلع فجأه للحياه العامه .
بس برضه فى رأى بيقول إن راجع لعدم إستعدادها للتعامل مع الحياه بواقع تربيتها جوه البيت و إعدادها من صغرها إنها تكون ربه بيت .
فعلاً كلام صح . بس بعدين ؟؟
تعالوا نتكلم فى الواقع شويه
راجل مهندس سكندرى متعلم و متفتح و فاهم 😛
إتجوز واحده بتشتغل
و خلفوا عيلين زى الفل
تعالوا نشوف واقع اليوم عامل إزاى
الزوج بشتغل فى المنطقه الصناعيه فى برج العرب
بيطلع 6الصبح عشان يكون فى المصنع 7 و ده معناه انه بيصحى من النوم أصلا 5 صباحا
و يرجع الساعه 6 مساءً مش شايف قدامه يدوب ياكل اللقمه و ياخدد دش ويقعد شويه مع العيال و ينام عشان يصحى تانى يوم
الزوجه بقى بتصحى قبل الزوج بساعه : يعنى الساعه 4 صباحا عشان تعرف تعمل فطار للزوج و العيال قبل ما يروحو المدرسه
الزوج يا دوب ينزل 6 تبدا الزوجه تصحى العيال و تفطرهم و تظبطهم عشان المدرسه الساعه 7
يا دوب العيال ينزلوا المدرسه تنزل الزوجه جرى على شغلها و يا دوب تلحق و حظها نيله لو ملهاش عربيه و حتضطر تركب مواصلات .
ترجع الزوجه من الشغل الساعه 2 جرى عشان تلحق تعمل الغدا للعيال قبل ما ييجوا من المدرسه خلصانين
ييجى العيال الساعه 3 ياكلوا و تبدا الأم تتابع الواجبات و الذى منه
متلحقش تشم نفسها يكون الزوج جه من الشغل قاطع من الجوع
تحطله الأكل و ياكوا سوا يادوب تكون الساعة 7:30 مثلاً
الزوجه منهكه تماما وعلى وشك الإغماء
و لسه البيت زى الزفت و فى مواعين
و حتى لو الزوج و الأولاد ساعدوا فى المرحله دى مش حتفرق لأن كده كده الزوجه غالبا غابت عن الوعى
و مصيبه بقى لو حد قرر يزورهم
ده ايه الشغلانه الخرا دى ياخويا
هو ده اللى انتوا عايزينوا ؟؟
معتقدش طبعاً
أنا مش ضد عمل المرأه إطلاقاً و لا ضد المساواه
أنا بس مع حكم العقل
و كل أسره ليها وضعها الخاص اللى تقدر تساوى بيه أمورها
الموضوع مش حرب
لسه عايزينوا يبقى هما و إحنا و الحزب الحاكم و المعارضه ؟
مش لازم يبقى الإستقلال و الشغل و المساواه اكلاشيهات محفوظة
الحياه عشان تمشى لازم الناس تكون من العقل بحيث تعرف تظبط نفسها و حياتها بالشكل اللى يناسبها
————-
حاجه تانيه الناس مش قادره تستوعبها , و هى الصراع جوه الراجل المصرى نفسه .
الراجل المصرى المتعلم العادى ممكن يتقبل حاجات كتير أوى بس لحد ما تميه هو شخصياً
يعنى ممكن يصاحب 100 بنت و هما مجرد أصحاب و هو متفهم ده و عارفه كويس و يكون منهم كل الأشكال و الألوان ..
ممكن جداً يقعد فى مكان مع واحده صاحبته بتشرب سجاير و يقوم يحط صباعه فى عين التخين بدعوى الحريه الشخصيه
و عنده حق
بس يا ترى لو صحى يوم لقى أخته قاعده فى الصاله بتشرب سجاير
أو راح كافيه لقاها قاعده مع شلة ولاد صحابها
هل حيكون رد فعله هو هو ؟؟؟
ممكن
و ممكن لأ
بس المؤكد إنه حيبقى فى منتهى الإرتباك .. مش عارف يمشى ورا مين ؟
الحاجلت اللى إتربى عليها و اللى فى نحله بتزن جواه بيها
و لا طريقه الحياه المتحضره اللى بيحاول يقنع نفسه بيها
أنا شخصيا , مش عارف
يا ليلات … يا اللى مش ليلات
قولولى
أنتوا عايزين ايه بالظبط؟
و عايزين منى إيه؟
و أنا شخصيا المفروض أعيش بأى طريقة بالظبط ؟
Zero effect 